ទស្សនាវដ្ដី "កេរដំណែលខ្មែរ" ជាទស្សនាវដ្ដីផ្នែកសិល្បៈ និងបុរាណវិទ្យាដំបូងបង្អស់នៅក្នុងព្រះរាជាណាចក្រកម្ពុជា។ ទស្សនាវដ្ដីនេះ គឺជាលទ្ធផលមួយដ៏ត្រចះត្រចង់ដែលស្ដែងចេញពីការខិតខំប្រឹងប្រែង របស់ក្រុមការងារស្រាវជ្រាវនៃនិស្សិត និងសាស្ត្រាចារ្យដែលមានជំនាញស្ទើរគ្រប់ផ្នែកដូចជា បុរាណវិទ្យា ស្ថាបត្យកម្ម សិល្បៈ វប្បធម៌ អារ្យធម៌ សិលាចារឹក ប្រវត្តិសាស្ត្រ ទេសចរណ៍ បរិស្ថាន ព័ត៌មានវិទ្យា សេដ្ឋកិច្ច និងអ្នកជំនាញលើផ្នែកស្រាវជ្រាវផ្សេងៗទៀតដែលរួមមានទាំងជនជាតិ ខ្មែរ និងបរទេសជាច្រើនរូបទៀត។ ក្រុមការងារទាំងអស់ បានរួមមតិគ្នាជាធ្លុងមួយក្នុងការបង្កើតឲ្យចេញនូវអ្វីដែលហៅថា "ផ្លែផ្កានៃកូនចៅខ្មែរជំនាន់ក្រោយ" និង នៅក្នុងទឹកចិត្តដែលស្រឡាញ់ជាពន់ពេកនូវកេរដំណែល និងសម្បត្តិវប្បធម៌ខ្មែរដែលមានអាយុកាលដ៏យូរលង់។ យើងខ្ញុំទាំងអស់គ្នា មានឆន្ទៈតែមួយ គឺខិតខំធ្វើយ៉ាងណាដើម្បីជួយថែរក្សាការពារ និងផ្សព្វផ្សាយវប្បធម៌ អារ្យធម៌ខ្មែរ ទៅតាមលទ្ធភាពដែលអាចធ្វើទៅបាន ជូនទៅដល់មតិជាតិ និងអន្តរជាតិ ហើយជាពិសេសគឺប្រជារាស្ត្រដែលជាកូនខ្មែរគ្រប់រូប ដើម្បីឲ្យយល់អំពីតម្លៃនៃសម្បត្តិវប្បធម៌ជាតិ និងជួយរួមគ្នាថែរក្សាសម្បត្តិ និងកេរដំណែលទាំងនោះ កុំឲ្យបាត់បង់បន្តទៅមុខទៀត ហើយដើម្បីឲ្យស្របទៅនឹងពាក្យស្លោកថា "វប្បធម៌រលត់ ជាតិរលាយ" "បំផ្លាញវប្បធម៌ គឺបំផ្លាញអត្តសញ្ញាណជាតិ" "ថែរក្សាវប្បធម៌ គឺថែរក្សាបាននូវព្រលឹងជាតិ"។
ទម្រាំតែលេចចេញជាស្នាដៃមួយនេះឡើង ក្រុមការងារយើងទាំងអស់គ្នា ទាំងនៅក្នុង និងក្រៅប្រទេស បានខិតខំប្រឹងប្រែងយ៉ាងអស់ពីកម្លាំងកាយចិត្ត ដើម្បីស្រាវជ្រាវរកព័ត៌មានទាំងឡាយណាដែលពាក់ព័ន្ធនឹងវប្បធម៌ខ្មែរ។ អត្ថបទដែលចុះនៅទស្សនាវដ្ដី "កេរដំណែលខ្មែរ" សុទ្ធសេងតែសរសេរឡើងដោយយកចិត្តទុកដាក់បំផុត ព្រមទាំងមានការត្រួតពិនិត្យសារឡើងវិញពីសំណាក់លោកសាស្ត្រាចារ្យ បណ្ឌិតទៅតាមជំនាញរបស់ពួកគាត់រៀងៗខ្លួន ដើម្បីធ្វើឲ្យអត្ថបទស្រាវជ្រាវទាំងនោះ កាន់តែមានភាពរលូន និងទូលំទូលាយ។ រាល់ពាក្យពេចន៍ដែលយើងខ្ញុំបានប្រើនៅក្នុងអត្ថបទនោះ គឺជាពាក្យដែលងាយយល់ ហើយមិនស៊ីជម្រៅដូចជាឯកសារស្រាវជ្រាវបែបវិទ្យាសាស្ត្ររបស់អ្នក ប្រាជ្ញដែលមានជំនាញឡើយ ដើម្បីសម្រួលដល់អ្នកអានទាំងអស់មិនឲ្យមានភាពសាំញ៉ាំ និងពិបាកយល់។ និយាយជារួម "ទស្សនាវដ្ដីនេះគឺរៀបចំឡើងសម្រាប់កូនខ្មែរគ្រប់រូប" ។ អត្ថបទទាំងអស់ គឺត្រូវបែងចែកទៅតាមប្រភេទនៃផ្នែកនីមួយៗនៅក្នុងទំព័រដូចជា៖ បច្ចុប្បន្នភាព អត្ថបទស្រាវជ្រាវ ឯកសារ ទំនៀមទម្លាប់ ទេសចរណ៍ ការស្វែងយល់អំពីប្រពៃណី និងទនៀមទម្លាប់ ស្ថាបត្យកម្ម គំនូរបុរាណ ធម្មជាតិ និងព័ត៌មានផ្សេងៗដែលពាក់ព័ន្ធនឹងវិទ្យាសាស្ត្រស្រាវជ្រាវលើផ្នែក វប្បធម៌ ព្រមទាំងកម្មវិធីនៃសិក្ខាសាលាស្ដីអំពីវប្បធម៌ដែលមាននៅក្នុង និងក្រៅប្រទេស។ ក្រៅពីនេះ យើងខ្ញុំក៏មានណែនាំផងដែរ ដោយសរសេរជាអត្ថបទសង្ខេបខ្លីៗនូវសៀវភៅ និងគេហទំព័រទាំងឡាយណាដែលពាក់ព័ន្ធនឹងផ្នែកស្រាវជ្រាវអំពីខ្មែរ ដើម្បីផ្ដល់ភាពងាយស្រួលដល់អ្នកអាន និងអ្នកស្រាវជ្រាវដែលចង់ធ្វើការស្វែងយល់បន្ត។
ជាចុងបញ្ចប់នេះ តាងនាមឲ្យក្រុមការងារទាំងអស់នៃទស្សនាវដ្ដី "កេរដំណែលខ្មែរ" ហើយក៏ជាក្រុមស្ថាបនិកនៃ "មជ្ឈមណ្ឌលស្រាវជ្រាវ និង អភិវឌ្ឍន៍វប្បធម៌កម្ពុជា" ទូលព្រះបង្គំ ខ្ញុំបាទ សូមថ្លែងនូវអំណរព្រះគុណ និងអរគុណថ្វាយដល់ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងជូនដល់ថ្នាក់ដឹកនាំព្រឹទ្ធសភា រដ្ឋសភា រាជារដ្ឋាភិបាល សម្ដេច ទ្រង់ ឯកឧត្តម លោកជំទាវ លោក លោកស្រី អ្នកនាង កញ្ញា សាស្ត្រាចារ្យ និងបណ្ដាក្រុមហ៊ុនទាំងអស់ដែលបានផ្ដល់ជាកម្លាំងចិត្ត ជួយគាំទ្រដល់ក្រុមការងាររៀបចំទស្សនាវដ្ដីជារៀងរហូតមក និងជួយជំរុញឲ្យយើងខ្ញុំបន្តការងារស្រាវជ្រាវ និងថែរក្សាកេរដំណែលនៃវប្បធម៌ខ្មែរតទៅមុខទៀត។ យើងខ្ញុំក៏សូមថ្លែងអំណរគុណផងដែរ ដល់ម្ចាស់អត្ថបទទាំងអស់ ដែលបានចំណាយពេលវេលាដ៏មានតម្លៃ សម្រាប់ការសរសេរជាអត្ថបទស្រាវជ្រាវខ្លីៗ ផ្ញើមកកាន់ទីស្នាក់ការទស្សនាវដ្ដីយើងខ្ញុំ ដើម្បីជួយចុះផ្សាយក្នុងន័យចូលរួម ចែករំលែក និងផ្សព្វផ្សាយនូវចំណេះដឹងផ្សេងៗស្ដីអំពីការងារស្រាវជ្រាវទៅលើ វប្បធម៌ខ្មែរ។ យើងខ្ញុំនឹងរង់ចាំស្វាគមន៍នូវរាល់អត្ថបទរបស់លោកអ្នកដែលស្រឡាញ់ ខ្មែរ និងចង់លើកស្ទួយថែរក្សា ការពារកេរដំណែលខ្មែរ ដើម្បីចុះនៅក្នុងលេខក្រោយៗទៀត។ ជាងនេះទៀត យើងខ្ញុំក៏រង់ចាំទទួលស្វាគមន៍ផងដែរ នូវរាល់ការទិតៀន ប្រៀនប្រដៅពីសំណាក់ព្រឹទ្ធាចារ្យ និងមតិរបស់លោកអ្នកអានទាំងអស់ ដើម្បីកែលម្អក្នុងន័យស្ថាបនា និងដើម្បីធ្វើឲ្យអត្ថបទស្រាវជ្រាវសម្រាប់ចេញផ្សាយនៅលេខក្រោយៗ ទៀត កាន់តែមានភាពសម្បូរបែប។
ទូលព្រះបង្គំ ខ្ញុំបាទសូមថ្វាយព្រះពរ និងជូនពរថ្វាយដល់ព្រះមហាក្សត្រ សម្ដេច ទ្រង់ ឯកឧត្ដម លោកជំទាវ លោក លោកស្រី អ្នកនាង កញ្ញា និងបងប្អូនប្រជារាស្ត្រខ្មែរទាំងអស់ សូមបានប្រកបនូវពុទ្ធពរទាំង ៤ ប្រការគឺ អាយុ វណ្ណ សុខ ពល កុំបីឃ្លៀងឃ្លាតឡើយ។ ទូលព្រះបង្គំ ខ្ញុំបាទមានជំនឿយ៉ាងមុតមាំថា ទស្សនាវដ្ដី "កេរដំណែលខ្មែរ" នេះនឹងទទួលបានការគាំទ្រយ៉ាងច្រើនលើសលប់ពីសំណាក់មិត្តអ្នកអាន និងពី ប្រជារាស្ត្រដែលជាកូនខ្មែរគ្រប់រូប។
សូមគោរពថ្វាយព្រះពរ និងជូនពរពីក្រុមការងារទស្សនាវដ្ដី "កេរដំណែលខ្មែរ"។